МБОУ "Танаринская СОШ"

Адрес: МБОУ "Танаринская СОШ" 678321, Республика Саха (Якутия), Кобяйский улус, с.Сайылык, ул.Саввинова, 3.
Телефон: 84116324688, 84116324689, факс: 84116324739
E-mail: kafgum@inbox.ru

Версия для слабовидящих
 

Бүтэһик чуораан чугдаарда

24 мая 2018 г.

Дьыл-хонук аастаҕа түргэнин,

                                                   Оҕолор бу номнуо улаатан,

                                                   Бүтэһик чуорааны кэтэһэн

                                                   Тыаһыырын долгуйа күүтэллэр...

                                                                                             (Удьурҕай.Нам)

Ыам ыйын 23 күнүгэр Мукучуга И.Е.Левин аатынан Танара орто оскуолатын, Мукучу гимназиятын бүтэрээччилэргэ анаммыт “Бүтэһик чуораан”бырааһынньыга буолла. 2018 сылга  бу икки үөрэх кыһатын барыта 31 оҕо бүтэрэр, биир кэлим эксээмэҥҥэ киирбиттэрин  туһунан анал бирикээһи оскуола директора Е.П. Эверстов, гимназия иитэр үлэҕэ директоры солбуйааччы Софронеева М.Н. билиһиннэрдилэр.

Танара орто оскуолатын 12 оҕо бүтэрэр, кылаас салайааччыта уруһуй, черчение учуутала Каратаева Раиса Николаевна. “А” буукубаттан саҕалаан, билиигэ сирдээбит бастакы учууталлара Новикова Е.Н.,Иванова М.И.   Быйылгы үөрэх дьылыгар Танара орто оскуолатыгар бизнес-инкубаторы тэрийиигэ үлэ барбытын, оскуола коллектива уонна үөрэнээччилэр Норуоттар икки ардыларынааҕы  М.В.Ломоносов, академиктар И.Н., Н.Н. Блохиннар ааттарынан  ааҕыыларга  ситиһиилээхтик кыттыбыттарын туһунан  научнай-методическай үлэҕэ директоры солбуйааччыта Аммосова Т.К. кэпсээтэ. Оскуола научнай салайааччытынан СР наукатын үтүөлээх деятеля, СР доруобуйатын харыстабылын туйгуна, тыа хаһаайыстыбатын наукатын  доктора, Россия естествознаниятын  академиятын академига  Константин Максимович Степанов анаммытын, уонна кини  үөрэнээччилэргэ, төрөппүттэргэ, учууталларга нэһилиэк общественноһыгар ыыппыт эҕэрдэтин үөрүүлээх быһыыга – майгыга иһитиннэрдэ. Тыа хаһаайыстыбатын хайысхатынан элбэх научнай конференцияларга ситиһиилээхтик кыттыбыт, оскуола агротехническай хайысханы бигэтик ылынарыгар тус кылаатын киллэрсибит оскуоланы быйыл бүтэрэр үөрэнээччигэ  Левченко Аллаҕа оскуола аатыттан анал стипендияны туттарда.

 Гимназияны 19 бүтэрэр, кылаас салайааччыта үрдүк категориялаах нуучча тылын учуутала Новикова М.В. Бу үөрэх кыһатыгар  наар туйгуннук үөрэммит Кычкина Сайыына анал бириэмийэнэн наҕараадаланна.

 11 сыл устата музыкальнай оскуолаҕа,”Дьоҕур кыһата” эбии үөрэхтээһин киинигэр, Саха төрүт көрүҥнэригэр уһуйар спортивнай оскуолаҕа, оскуола библиотекатыгар,  “Дайан” культура киинигэр араас тэрээһиннэргэ, куруһуоктарга ситиһиилээхтик дьарыктаммыт оҕолорго махтал суруктары, анал бириэмийэлэри туттардылар.

 Ол курдук “Мукучу нэһилиэгэ МТ” анал стипендиятын хаһаайыннарынан Танара орто оскуолатыттан  Черноградскай Влад, гимназияттан Кычкина Айыына буоллулар. Арыттаахтан, Баҕадьаттан кэлэн үөрэнэр түөрт оҕоҕо нэһилиэктэрин дьаһалтата, үөрэммит оскуолалара эҕэрдэлэри ыыппыттар.

   Кыра эрдэҕиттэн араас ырыа конкурстарыгар кыттан элбэх ситиһиилэрдээх гимназия выпускнига Айсен Иванов Левчиков И.Н. аатыттан анал стипендиянан, музыкальнай оскуолаттан, “Дайан” культура кииниттэн бириэмийэлэннэ уонна бар дьонун ырыанан эҕэрдэлээтэ.

   Бастыҥ спортсменнарбыт – Петя Степанов, Костя Ноговицын хапсаҕайга I разряды толорбуттарын туһунан сибидиэтилистибэни туттулар. Хапсаҕайга юношескай разряд уонна ГТО нуорматын кыһыл көмүс значогун Левчиков Альбертка иҥэрдилэр. Хапсаҕайга ситиһиилээхтэр Иванов Айсен,  Иванов Гриша, мас тардыһыытыгар кыайыылаахтар Гуляев Федя, Соломонова Аида спортоскуола аатыттан биһирэннилэр.

 Нэһилиэкпит  үтүө дьонун  ааттарыгар, сырдык кэриэстэригэр анаммыт анал бириэмийэлэри: Ороубуна 30 сыллааҕыта Танара орто оскуолатын ситиһиилээхтик бүтэрбит Агеева Ольга аатынан анал стипендияны Иванова Настяҕа Докторовтар дьиэ кэргэннэрэ  туттарда. Биология, химия  учуутала, оройуоннааҕы үөрэх салаатын методиһынан, “Дьоҕур кыһата” эбии үөрэхтээһин киинин директорынан үлэлээбит  Самсонова М.И. аатынан анал стипендия Борисова Наташаҕа бэрилиннэ. 7 сылын Новиковтар педагогическай династиялара  оскуола уонна гимназия выпускниктарыгар анал стипендия олохтуур,  ол бириэмийэни быйыл Андрееев Айталга (гимназия), Гуляева Ангелинаҕа  (оскуола) анаан педагогическай династия салайааччыта, Танара оскуолатын Бочуоттаах выпускнига, улуус уонна нэһилиэк Бочуоттаах олохтооҕо Кириллова Л.В.  туттарда.

   “Бүтэһик чуораан” бырааһынньыга – хас да  нэһилиэк бүттүүнүн  бырааһынньыга ким эрэ оҕото, сиэнэ, табаарыһа бүтэрэр буолан олус үөрүүлээх, долгутуулаах. Маастар – кондитер П.Афанасьева, төрөппүт Е.Гуляева хас биирдии оҕо аатын минньигэс тортка суруйан, киэргэтэн оҥорбуттар.  Бырааһынньык  выпускниктар аныгы үҥкүүлэринэн, сэргэх  ырыаларынан, чуораан лыҥкынас тыаһынан  түмүктэннэ.  

         Чугдаар, чугдаар өрүү эдэр

         Чобуо тыллаах чуораанчыгым... (Иван Егоров)

                                                         Ксения Новикова.